خياااال مآاتة

خيال مآتة … من ســــنين
واقف في بسـتان العــــنب
تحت القماش قلبه الحـــزين
اسمع … وبلسانه الســـبب
حارس على أرض الجـــدود
أخرس .. كسيح .. يا للعجــب
مغلوب على أمري و كتيـــر
قدّام عنيّه باتنهـــــب ..!
خيال مآتة … من ســــنين
واقف فى بســـتان العــنب
عصـفورة م اللى ماتختشــيش
نازلة تنقّـــر فى الغــيطان
صاحبتها ندهـت : ما تروحيش
راجل وواقــف ديْدبـــان ..
ردّت بضحكة ما تتنســـيش :
راجـل ولكنّــه … جبـــان
فوق راسه حانزل .. ما تخافيش
دا خيال مآتة .. من خشـب ..!
خيــال مآتة من ســـنين …
واقـف فى بســتان العــنب
ساكن لوحــدى فى البــراح
مخلــوق ولكــنّى عـــدم
أنا زى حــارس أعـدمــوه
واستخدموه لمــا اتعــــدم
واقــف ومليانى الجــــراح
وجراحــى ما بتنزفـــش دم
وبكيـت ولكــن للأســـف
نزلت دموعــى من حطـب ..!
خيــال مآتة مـن ســـنين
واقف فى بســـتان العــنب
وفى وسـط أحزاني الكتيــر
مرة حلمــت بإنّـى حـــىّ
فوق راســى تـاج زى الأمير
راكب حصان … رايـح وجاىّ
ماسك فى إيدى ســيف خطير
بطوى غـيطان الأرض طــىّ
ولا كنت بلمــح أى طيـــر
غير فى المجـلات والكتب .. !
خيـــال مآتة من ســـنين
واقف فى بســـتان العنب ..
وشــكيت لكــل الفلاحيــن
فهمــوا تمـام … المشكلـة
قيمتك فى أوسـاط الطيـــور
لازم تــزيــد .. إلاّ فلا ..
واتشاوروا ولمـدة عامـين ..
وصلــوا لحل المســـألة ..
باركلــى يا صاحبى .. هأكون
خيال مآتة .. من دهـــب .. !!